da "il Friuli del 16 febbraio 2001 Une vite in poesie

Contâ i fats che a sucedin te vite di ogni dì, ma ancje lis personis che nus stan dongje e i events de vite coletive. Al è chel che à fat par tancj agns, cun passion e pazienze, Rina Peressotti: e à doprât il mieç espressîf che i lave miôr, chel de poesie, par meti su la cjarte chel che i sucedeve ator. Cussì la so vite, fermade masse adorate tal 1988 (e veve nome 54 agns), e je come un cuadri fat di peraulis, une dongje di chê altre.

A plui di dîs agns de sô muart, la famee, l'om e i sie fîs, a an decidût di publicâ un libri cun lis poesiis, cussì di fâ cognossi a plui personis il cuadri che cheste femine nus à lassat. Al è saltât fûr un volum di passe 300 pagjinis, che al ten dentri dut chel che Rina e à vût scrit ma ancje tantis fotografiis de sô famee, la storie de gjenelogjie familiâr dai Peressotti di Pagnà, e articui di gjornâl che a an fevelât di jê. Leî il libri al vûl disi un pôc jentrâ inte vite di chês personis che i son stadis dongje: al sucêt cun "Giancarlo" o "Teresa e Agnul", poesiis dedicadis a la nassite di un fî o a lis gnocis di une sûr. Ma ancje ae atualitât di chei agns, come la poesie dedicade a Aldo Moro, tal moment dal rapiment de bande des Brigadis Rossis. Opur, Rina e conte di un viaç a Rome o Medjogurie cui amîs de parochie, dulà che e jere unevore ative al pont di vê colaborât ae publicazione dal libri "Pagnacco, la gente di racconta". Il libri cun lis sôs poesiis si intitule "Partint de Liule", cjapant il nom dal riul "Liule" e dai cjasai che i stan dongje, su la strade che e mene di Pagnâ a Colorêt. Lis poesis a son scritis par furlan, gjavant fûr juste cualchidune dulà che e à doprat l'italian. Il lôr valôr al sta soredut inte documentazion di un percors di vite, no dome che individuâl ma ancje de comunitât, stant che daspes i episodis ogjet de poesie a jerin fats che rivuardavin la coletivitât.